Busturialdeko Hitza

nabarniz » herri kirolak

Gizon proba txapelketa hilaren 25ean

Amaitu da izena emateko epea eta eskualdetik ordezkari bi izango dira

zihara enbeita

Iazko moduan, aurten ere, Nabarnizen izango da Bizkaiko gizon proba txapelketa. Eta oraingoan Euskadikoa ere bai. Egun berean jokatuko baitira txapelketa biak, datorren azaroaren 25ean, hain zuzen ere.

Dagoeneko amaitu da izena emateko epea eta guztira zazpi probalarik parte hartuko dute. Horietatik eskualdekoak bi izango dira, Mikel Alzola gernikarra eta Carlos Ormaetxea busturiarra, hain zuzen ere. Alzola bera dugu Bizkaiko txapelduna. Zortzi txapel lortu ditu dagoeneko. Euskadikoak ere zazpi ditu, baina azkenengoan ezin izan zuen parte hartu eta Juan Carlos Lopez arabarrak jantzi zuen Euskadiko txapela Aizarnazabalen (Gipuzkoa).

Txanda bi

Eskualdeko ordezkariekin eta Juan Carlos Lopezekin batera, Etxebarriko Fernando Zarrabe Basaibar-ek, Karmelo Ibarluzea Satxibar-ek eta Gaizka Goenagak parte hartuko dute. Baita Iruzubietako Enrike Arrazolak ere.

Iazko moduan, goiz eta arratsaldez izango dira probak. Lehenengo txanda 12:00etan izango da eta 85 kilotik beherako probalariek parte hartuko dute. Bigarren txanda, ostera, 17:00etan hasiko da.